AWS
(Amazon Web Services) Hodei zerbitzuen eskaintzan liderrak dira. Gure
ikasleek probatzea gustatuko litzaiguke, Hodeia IT profesionalaren
oraina eta etorkizun hurbila delako. Ez dugu pausoz pausoko tutorial bat
egin nahi, horrelako asko dagoelako, baina gure ikasleei nondik hasteko
pista batzuk eman nahi dizkiegu.
Hitz
gutxitan, AWS tarifa batengatik edozeini bere konputagailu zerbitzariak
alokatzen dituen Hodei zerbitzuen hornitzailea da. Zerbitzu-karta oso
zabala eskaintzen du, konputagailu batekin egin daitekeen edozer gauza.
Adibide arruntena beraien zerbitzarietan makina birtualak martxan
jartzea da. Konputagailu bat erosi ordez, esan dezagun, webgune bat
argitaratzeko, EC2 (Elastic Compute Cloud) zerbitzuan makina birtual bat
"jaurti" dezakegu (launch) eta bertan webgunea jarri. Hau ez da
daukagun aukera bakarra (hosting zerbitzu bat erabili nezakeen
horretarako), baina ongi azaltzen du ideia: edozertarako nire
konputagailuak erabili ordez, Amazonenak erabiliko ditut. Sarrera labur
baterako Simplilearnen bideoa oso ongi dago.
Jarraitu baino lehen, beste Hodei zerbitzu batzuetan gauza berdina (VM bat martxan jartzea) egin genezake: Microsoft Azure, Google Cloud Platform, Alibaba Cloud,
etab. Ez pentsa hala ere askoz gehiago daudenik, Hodei zerbitzuak
hornitzen lehiakorra izateko konputagailu alimaleko kopurua behar
delako, baita azpiegitura itzela ere.
AWSn
doako kontua erraz ireki dezakezu, baina alde txarra ordainketa-metodoa
eman behar dela. Doako zerbitzu ugari daude (free tier deitzen diote),
baina badaezpada ere ordaintzeko zerbitzu bat nahi gabe erabiliko
bazenu, haiek kobratzeko modu bat eduki nahi dute. Honek gure ikasleak
beldurtu eta atzera botatzen ditu maiz. Horietako bat bazara, eskatu
laguntza zure irakasleei.
Behin kontu bat
daukazunean, ikasketa kurba oso pikoa da. Zerbitzu ugari dago eta haien
konplexutasuna aldakorra da. Ez da zaila VM bat martxan jartzea, baina
Ikasketa Automatikoko eredu bat entrenatu nahi baduzu, gauza pittin bat
konplikatzen da. Edozein kasutan, denontzako lekua dago AWSn.
[Oin-ohar
bezala, sei bat Hodei hornitzaile probatu ditugu eta sentsazioa da AWS
dela ikasle eta antzerakoei errazen jartzen diena. Hau guztiz
subjektiboa da eta esan beharra dago beste Hodei hornitzaileak ere
mundialak direla.]
Hara ba, blogaren beste sarrera
batzuetan bezala, ariketa erraz pare bat proposatuko dizuegu pixka bat
ikasi eta beldurra galtzeko Hodeiari. Hodeiaren munduan serio murgildu
nahi baduzu, AWS Cloud Practitioner Essentials
ikastaroa egin dezakezu, baina 20 ordu irauten du. Zoritxarrez, gure
ikasle gehienek ez dute denbora gehiegi, beraz, motzagoa (ordubete
inguru) den AWS Foundations
ikastaroa egin dezakezu. Amazon kontu batekin nahikoa da horretarako
eta osaketa-zertifikatua emango dizute amaieran. Zure lagunei harro
erakutsi diezaiekezu eta zure irakasleei ere bidali. Informazio gehiago
ondorengo estekan:
Behin
oinarriak ikasten dituzunean, EC2 instantzia bat jaurti dezakezu
(Makina Birtual bat). AWS Management Console delakoan pausoz pauso sortu
dezakezu edo irakasleek eskainitako AMI irudia erabil dezakezu (Amazon
Machine Image). Neurrira egindako AMIak zure instantziak antolatzeko
modu bikaina dira. VM jakin baten nolabaiteko "argazki izoztua" dira eta
aukera ematen dizute besteekin partekatzeko edo zure instantzia
orijinalaren kopia ugari martxan jartzeko. Adibidez, guk Ubuntu AMI bat
sortu dugu flask-en oinarritutako Python web aplikazio batekin, beste
Windows AMI bat besterik gabe Mozilla Firefox instalatuta duena eta
hirugarren AMI bat Windows, LabVIEW 2020 eta Mqtt.fx instalatuta duena.
Orain klik gutxitan horietako edozeinen kopia martxan jarri dezakegu.
Behin
instantzia sortzean, konektatu zaitezke "Connect" botoia sakatu eta
argibideak jarraituz. Sistema eragilearen arabera ezberdin konektatuko
zara. Adibidez, Windows instantzia batera konektatzeko RDP erabili behar
da.
Ondoren
ikusiko duzun erantzuna, pasahitza deskodetzeko gako parea erabili eta
gero, ondorengo irudian ikus dezakezun leihoa litzateke:
Saia
zaitez Linux eta Windows instantziak sortzen, egin gauzaren bat
horietan eta partekatu itzazu emaitzak zure lagunekin eta irakasleekin.
Oso ongi sentituko zara!
Amaieran, gogoratu zaitez instantziak gelditu ala ezabatzeaz, zure kreditu-txartelean gasturik ez izateko!
